政情：交通噪音滋擾20年 區議員組特工隊施壓
荃灣區議員劉卓裕（Adrian）話，其所屬嘅愉景選區居民過去逾20年深受附近嘅交通噪音影響，但政府一直未能解決問題，搞到一眾居民決定自救！
Adrian話自上任區議員後一直收到街坊求助，涉及噪音嘅投訴個案中，逾半同附近港鐵車廠露天掉頭路軌段有關；而9號幹線亦以高架行車隧道穿過愉景新城基座，非法賽車問題過去亦經常擾人清夢。之不過，負責規劃、監察同消減噪音工作嘅環境保護署過去一直都幫唔到居民解決問題，所以佢決定成立「噪音特工隊」向政府施壓。
開班教人量度分貝
佢又話唔少街坊投訴時，都只係話「有噪音」，但佢坦言單靠投訴數字難以迫使政府當局行動。佢就決定舉辦「量度噪音分貝工作坊」，教班街坊噪音嘅定義，同點樣用手機量度噪音嘅分貝，靠居民嘅力量幫手監察；而自己亦會用一部專業嘅分貝儀喺區內量度噪音，屆時有證有據，等官員冇咁易再走數喎。