中環出更：衣櫃太爆 執衫有法 黃瑞琪：放上網平賣費事嘥
近排天氣時凍時暖，厚薄衫逼爆衣櫃，淨係睇到啲衫已經頭痕，要執好個衣櫃分分鐘消耗大半日時間呀！前兩日卓妮出席維多利亞青年商會就職禮，同幾位成員傾開有乜執衫嘅秘技？
副會長黃瑞琪 （Vivian）話自己有一套轉季執衫技巧，會將過季衫褲用收納袋預先裝好，分門別類，盡量善用衣櫃擺放，但有時衣服太多，如果有啲衫唔要嘅話，就洗乾淨包好後，放落屋苑衣服收集箱。Vivian話亦有試過買咗返嚟之後都唔記得着，搞到自己執衫嘅時候先發現，就會將未着過嘅衫，放上網平價出售，一來等鍾意嘅人可以買到心頭好，二來又唔使嘥咗件衫一舉兩得。
雖則會長林育泉話自己唔係好怕凍，但今年啲天氣就比較寒冷，平時只有去外國先着到嘅厚褸，依家都會攞番一兩件出嚟着，自己就唔使點轉季執衫，仲講笑話，就算點執都好，永遠喺倉底嘅衫都搵唔番出嚟，加上工作繁忙，有時拎起手着就嗰件，就算買咗新衫喺嗰段時間都會不停着嗰件，搞到啲衫愈疊愈高。
潘穎欣：唔啱着就會捐出去
轉頭見到秘書長潘穎欣（Candace）同會員區玉頤。Candace就話轉季自己有執衫煩惱，相信每個女仔都會有，佢自己就習慣每樣嘢都分類好，知道嚟緊天氣會轉涼就會攞定啲褸出嚟先，啱着就會留低或者同家人交換着，如果揼咗啲衫好唔環保，唔啱着嗰啲就會捐出去，仲話好多時執衫期間都會有驚喜發生。執衫都有驚喜？係發現有啲衫係遺忘咗，搵番出嚟又可以當新衫着，佢仲話每次執衣櫃都要搞成大半日先搞掂。
卓妮