中環出更：勉年輕人開展事業 蔡卓慧：成功靠自己努力
年輕人嘅成長路途必然會遇上好多挑戰，如果可以將挑戰轉化為機會，就能夠邁向成功。社會服務機構行政總裁蔡卓慧（Vivian），指年輕人可透過機構所提供嘅眾多課程，體驗式學習同商界義工嘅交流，得到第一身經驗同市場資訊，希望年輕人認識自己、市場同世界，明白興趣、強項同價值觀，訓練創意與解難能力，對將來接受唔同挑戰非常重要。
Vivian又形容一班商界義工就好似大哥哥大姐姐，等年輕人知道生涯規劃並冇Model Answer嘅道理，只要靠自己努力，都可以闖出一條屬於自己嘅道路。
陳瑋瑜倡長期保持學習心態
喺內地互聯網公司任職助理互聯網產品經理嘅陳瑋瑜話，自己之所以到深圳發展，全因好奇嘅心態，事關內地互聯網發展速度非常快。佢又話自己嘅目標好清晰，有創業嘅諗法，所以先會揀喺深圳發展。陳瑋瑜又話，喺內地同香港工作有好多唔同嘅地方，其中包括高度同速度，佢舉例指，喺香港從事相關行業，接觸嘅用戶可能只係十幾萬個，但喺深圳發展頭幾個月，每發出一條短訊，就可能涉及過千萬個用戶。佢鼓勵有意到內地發展嘅年輕人必須鍛煉好普通話，了解自己興趣同有意從事嘅行業，仲有長期保持學習心態，有耐性面對新挑戰。
科技集團始創人及行政總裁魏嘉俊（Wiva），就勉勵年輕人要敢於跳出舒適圈，Wiva回想起當初到內地創業係想挑戰自己，佢話內地唔同嘅城市，都有唔同嘅優勢同政策扶持，搵呢啲資料嘅時候雖遇到困難，但好彩參加咗民政事務局同某青年團體合辦嘅創業計劃，公司最後成功落戶深圳福田，開始探索內地市場同發展業務。卓妮