政情：公民講場：路徑設計危機四伏 單車友善得個講字

為減低交通運輸所產生嘅碳排放量，政府致力喺新市鎮同新發展區推動「單車友善」環境，發展新界單車徑網絡。不過好多單車徑都係斷斷續續，有人計過由元朗到上水期間至少需要落車推車幾十次，當中又涉及唔少馬路或輕鐵路軌嘅交匯處，單車同其他車輛爭路好易會出事，新界區舊年就有過千宗涉及單車嘅交通意外。運輸及房屋局局長陳帆真係要同相關嘅政策局或部門好好傾吓，點樣改善單車徑設計上嘅缺陷，否則「單車友善」就只係得個講字。