經濟不景，唔少市民都期望政府再次向市民「派錢」。不過，政府過去多次推出惠民措施時，出現行政失當，令市民苦候多時先至取得政府嘅支援，令政策由「派糖」變成「派嬲」。政府尋日表示，當局已開發一個資訊管理系統，保存早前透過俗稱「派一萬蚊」嘅「現金發放計劃」所收集嘅資料，以便利日後再次運用。
議員林健鋒向創新及科技局提出書面質詢，關注政府近年每當推出新計劃時，例如喺2018年向合資格人士派發4,000蚊嘅「關愛共享計劃」，以及舊年嘅「保就業」計劃，均需頗長時間建立相關電腦系統，而申請人往往被要求重複填寫資料。
政府喺舊年12月推出《香港智慧城市藍圖2.0》當中提到，當局會開發一個資訊管理系統，以保存及便利日後運用「現金發放計劃」所收集嘅資料。創科局尋日喺書面回應中確認有關資訊管理系統已完成開發，意味政府將來再次推出類似計劃時，有望加快申請及其他行政程序。