政情：話盧偉國開會講錯嘢 鄭松泰：大家都未瞓醒

議員盧偉國率先發言支持增加設施，同時申報自己係機管局成員，但係佢又話「呢個項目就並非由機管局負責，因為以往嘅做法都係機場裏面個政府設施，都係由政府負責嚟立法會申請撥款。」而政府官員就話「冇乜回應，多謝主席。」

鄭多次問陳恒鑌有冇聽到

後來到鄭松泰發言，佢就話「唔知係咪理解錯呢？文件寫相關撥款工程係委託機管局進行」，又質問在席官員「點解盧偉國發言嘅時候，你唔糾正佢？」仲話盧表述同傾緊嘅項目不相符，官員有必要澄清。

盧就多次大聲反駁，指摘鄭「你聽錯咗！」而鄭就反問「我未瞓醒？」「我冇必要睇帶，你第一個撲出嚟噏錯，然後官員Hea答冇補充」，仲話「大家都未瞓醒啱唔啱先。」鄭多次嘗試詢問，同佢一條走廊之隔嘅議員陳恒鑌（Ben）有冇聽到盧講錯，但Ben就冇出聲，鄭就惟有話「唔會拉你落水喇。」

其實Ben就比較關注聯運大樓計劃中嘅機場海天客運碼頭，話希望政府考慮喺擴大碼頭嘅面積同增設設施後，唔好淨係作客運轉航用途。運輸及房屋局副秘書長劉家麒回應，話聽到社會有相似提議，不過會將碼頭維持現有角色。Ben就唔滿意，話政府唔聽社會意見，仲預料碼頭將會係計劃中嘅「敗筆」呀！