政情：中環出更：信件用英國名牌紙 貴成10倍 港府戀殖 議員叫慳啲
雖則高舉「量入為出」嘅理財原則，但政府使錢向來都好疏爽。立法會尋日進行《2020施政報告》致謝議案辯論，議員陸頌雄發言時就指政府畀議員嘅信件，所用嘅紙張係來自英國名牌，貴過普通白紙成10倍！
50張紙索價40港元
陸頌雄發現喺政府畀佢嘅信紙上有暗花，非常精緻，查看之下先至發現信紙係來自英國高級商用紙張，50張紙要40港元，差唔多一蚊一張紙，普通嘅白紙都唔使一毫子一張啦！陸話明白政府可能想用靚啲嘅紙以示誠意，但其實應該慳得就慳囉！
所謂見微知著，陸認為引伸至好多公共開支上，都希望政府可以盡量簡約，例如興建公共設施時，市民要嘅係講求實用同埋可以盡快提供服務，而唔係一棟外表華麗嘅建築物。
陸認為政府嘅工作速度要跟得上世界千變萬化嘅節奏，而唔係因循守舊。政府選用英國名牌靚信紙，莫非仍然眷戀英殖時代？
卓妮