政情：中環出更：讀歷史要分心 丁新豹：勿齋睇文獻
中國五千年嘅歷史源遠流長，相關嘅文獻可謂車載斗量，令有志鑽研者目不暇給。中文大學歷史系名譽高級研究員丁新豹就主張，同學讀歷史不妨「分心」學習，原來講緊嘅係唔好局限於研究文獻，特別鼓勵佢哋了解考古學喎。
香港大學中國歷史研究文學碩士課程同學會，早前舉辦「香港青年史學家年獎」頒獎禮，丁教授大讚年輕一輩比佢當時嘅年代優秀得多，更指一個中三學生嘅研習作品令佢大吃一驚，直言自己喺同樣歲數時，除咗踢波就冇嘢識。面對咁多有志鑽研歷史嘅年輕人，丁教授勉勵佢哋要擴闊眼界，唔好局限於閱讀文獻，應該認識一下考古同藝術史，因為文獻已經被發掘得七七八八，嚟緊就要靠出土文物，更上一層樓啊。
李建深倡歷史與理科結合
深水埗主教山嘅百年配水庫，早前險被政府清拆，引起社會好大回響。美國普林斯頓大學藝術與考古學系李建深博士，認為事件正正係一個契機，令上至政府官員、下至學校嘅老師同學生，都重新思考遺迹嘅重要性，喚醒大眾對歷史嘅關注。歷史科當然屬於文科，但李博士認為唔可以故步自封，應該開放思維，將歷史同工程科，甚至生物、物理等傳統理科結合，秉持跨學科發展嘅目的。
其中一位得獎者，林嘉澔同學話，唔少人會認為要成為「青年史學家」，一定要學富五車、隨口講出一堆歷史事件，恍如一本「行走嘅人肉歷史書」先可以獲得殊榮。林同學打趣咁話，自己完全唔符合上述條件，但相信讀歷史並非要背誦大量歷史資料、爭取分數。佢分享細個嗰陣，已經對身邊事物充滿好奇心，務求要打爛沙盤問到篤，於是走上研習歷史嘅道路。林同學話前人種樹，留低博大精深嘅文化，後人絕對唔可以浪費，應該從理解歷史中了解自身責任。
卓妮