政情：懶理質詢 觀感唔好 建制派補鑊跑數

根據立法會規定，每次大會所提出嘅質詢數目唔可以超過22項，如果會議中唔會辯論不具立法效力嘅議案，口頭質詢上限為10項；若果要辯論有關議案，就最多只有6項口頭質詢。由於數目有限，以前泛民主派仲喺立法會時，口頭同書面質詢都爆晒。

之不過，我哋早前發現喺今日嘅立法會大會，分別只有6項同13項口頭同書面質詢。6項口頭質詢入面，仲要4項都係圍繞住疫情，包括議員盧偉國查詢應對疫情嘅措施；麥美娟就關注全民抗疫；柯創盛查詢具針對性嘅抗疫措施；同埋葛珮帆關注針對外傭嘅防疫工作。呢排疫情大爆發，難怪一班議員追住食物及衞生局局長陳肇始。

聲稱忙於炮製預算案建議

竟然書面質詢唔夠數，建制派冇得賴，唔知「班長」廖長江點反應呢？據悉，建制派發現議員提出嘅質詢少於上限數目之後，由於顧慮到觀感唔好，會令市民覺得建制派當道後，就懶懶閒唔盡責質詢政府。所以有個別議員收到「溫馨提示」，提醒以後要勤力啲提交質詢，唔可以再咁肉酸呀！但亦有議員反映，大家呢排都忙住「精心炮製」3,000字嘅財政預算案建議，擔心分配唔到時間。亦有議員話一向都係提交有關業界或者地區嘅質詢，之不過邊有咁多貼近時事嘅議題，而任期臨近尾聲，同業界相關嘅議題都問得七七八八咁話喎。總之就理由多多喇！

令人覺得內部協調出問題

但亦有議員承認事實，話依家冇咗反對派阻頭阻勢，再唔進取啲質詢政府，實在講唔通，亦會令人覺得建制內部協調有問題，之不過大部分人都覺得自己並冇偷懶喎。

其實喺下周三嘅大會一連3日就施政報告致謝動議進行辯論，並冇口頭質詢環節，但係書面質詢都暫時只係得12項，而補交質詢問題都已經截止，但係喺再下一個禮拜三，即係27號嘅大會，口頭質詢同書面質詢夾埋22條，即係夠晒數，當中有9個民建聯議員提問，自由黨亦有3名議員，而有個別議員仲打孖上，例如邵家輝同李慧琼問咗口頭同書面質詢各一、而葛珮帆亦問咗兩條書面質詢。

唔知係咪「問責」之後，班建制派議員即刻補鑊呢？