政情：青年宿舍搞10年 柯創盛嘲愛得太遲
外界一直批評興建青年宿舍進度慢，立法會民政事務委員會昨日召開會議，其中討論到香港女童軍總會及東華三院青年宿舍的建造工程，議員柯創盛（柯仔）批評政府嘅工程來得太遲，令好多需要青年宿舍嘅青少年得唔到幫助啊！
當局指前期工作較耐
柯仔指政府早喺2011-2012年嘅施政報告中宣布推行青年宿舍計劃，希望畀部分在職青年擁有自己居住嘅空間，同埋等青年租戶可以儲到錢。但數一數，2011年距離依家都已經10年啦，但政府依家先推出兩項青年宿舍建造工程，柯仔引用歌名《愛得太遲》，慨嘆政府做嘢慢呀！柯仔又關心現時宿位緊張，唔知政府有咩方法加快進度同埋搵多啲地興建宿舍呢？
當局回應表示，相信係工程嘅前期工作需時比較耐，所以先至會用咗比較長嘅時間準備，又指現有嘅非政府機構如果已經使用政府土地，就希望佢哋可以盡量一地多用，釋放現有未盡其用嘅土地的發展潛力。
香港女童軍總會及東華三院青年宿舍的建造工程項目最後係冇議員反對嘅情況下通過，將會提交工務小組委員會討論。