- on.cc 東網主頁
- 3月30日 (日)
唔少香港家庭都會養寵物，但亦有唔少人以不同嘅理由拋棄佢哋。晉峰青年商會將發起名為「愛寵同行」嘅計劃，希望可以向大眾宣揚「領養不棄養」嘅訊息。剛啱接任該會會長一職嘅陳曉晴（Christy）就話，當家庭入面有人懷孕，或者有新生命到臨，往往係寵物其中一個被遺棄高峰期，事關坊間存在誤解，以為寵物會對孕婦或BB有唔好嘅影響。
本身養緊一隻柴犬、正懷孕嘅Christy就同卓妮分享，提到家母曾擔心狗毛會對孕婦帶來不良影響，但佢亦準備咗唔少科學數據證明係無問題。Christy又話，只要經過適當嘅訓練，寵物同孕婦、小朋友係可以共融。Christy仲講到，查實佢丈夫本身係怕狗之人，但最終亦愛屋及烏，依家仲好鍾意同屋企隻柴犬一齊玩添！
負責項目嘅副會長崔偉浩（Keith）就提到，該會聯同犬隻訓練師拍攝共12條影片，將來會定期上載到網絡，向大眾教授簡單嘅狗隻訓練技巧。Keith指出好多寵物嘅壞習慣，其實都係由主人一手養成，例如當寵物做得唔好時，有啲主人會以為單純向寵物講「No」就可以解決問題，唔知道呢啲命令係要配合語調同其他動作一齊做，先可以畀到寵物明確嘅訊息。
而同樣參與項目嘅助理副會長羅汝傑（Bernard）就強調，養寵物係一生一世嘅承諾，又提到自己早前參觀收容被遺棄寵物嘅中心，覺得呢啲被拋棄嘅寵物其實都係好得意。佢又話自己都聽過，有朋友冇為寵物絕育，結果生咗好多隻後代，但又冇能力照顧好佢哋，最終要搵人接收咁話。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
