中環出更：新年伊始 馬逢國盼除罩笑臉迎人
踏入新一年要有新開始！本港喺2020年受疫情持續侵襲，唔少市民都經歷咗難捱嘅一年，但隨住各種疫苗開發成功，社會運作今年有望逐漸回復正常。體育、演藝、文化及出版界議員馬逢國就喺大除夕上載短片，話相信大家喺未來一年必定能走出疫情下嘅困局。咁展望2021年有咩願望呢？佢就希望大家以後都唔使再戴口罩喇！
過去一年，各行各業都受到疫情嚴重打擊，馬逢國所屬嘅四個行業都唔例外。佢就喺短片入面話，好多業界朋友喺過去一年都遇到好大困難，但就相信情況隨住疫苗嘅出現有望改善，仲話業界都好希望喺未來一年為市民製作更多更好睇嘅電影同表演等等。
由舊年年頭開始，市民出街都要戴口罩，街上再見唔到大家嘅笑容。馬逢國喺短片入面亦花咗啲心思，佢講到希望大家今年唔使再戴口罩時，就除低自己本身一直戴住嘅口罩，以真面目示人。查實呢個亦都係唔少市民嘅共同願望，卓妮都祝願大家可以夢想成真，可以好似馬逢國喺短片結尾笑得咁開心！
馮浩賢祝願朋友可相聚
疫情雖然為市民帶嚟唔少負能量，但係只要有心都可以搵到積極嘅一面。舊年年初，唔少香港居民滯留喺最先爆發疫情嘅重災區武漢，當時擔任香港駐武漢經貿辦主任嘅馮浩賢喺封城期間一直留守。依家已調任為政策創新與統籌辦事處副總監嘅佢就貼文，話感受到同家人團聚、齊齊整整食一頓飯，原來唔係一件天經地義嘅事，又祝願佢嘅朋友喺2021年可以唔受限制咁周圍去，老友鬼鬼一齊食餐飯。
同樣喺除夕貼文嘅香港廣西社團總會副會長陳志豪就無咁開心喇，佢話自己過去一年捱夜嘅次數係近年最多，仲要食咗唔少杯麵落肚，形容過去一年嘅生活狀態好唔理想，希望新一年會有啲好嘅改變喎。
卓妮