中環出更：民政處嘥錢整燈飾 區議員斥無心防疫
以往每逢特定節日，各區都會掛上琳琅滿目嘅燈飾慶祝。之不過，今年聖誕節喺街上嘅節日燈飾明顯減少，佳節氣氛亦遠遜往年，事關全港18區之中多達14區並冇區議會聖誕燈飾，包括早前否決撥款申請嘅深水埗區同沙田區。之不過，政府喺呢兩區都透過當區民政事務處批出撥款，照樣喺街頭上掛起聖誕燈飾，但做法引嚟部分區議員不滿。
多區曾否決撥款
深水埗區區議員何啟明尋晚上載短片，覺得花一大筆錢嚟整燈飾冇乜意義，所以反對相關撥款申請；又覺得啲錢應該用喺更有意義嘅地方，例如喺疫情下拎嚟買防疫物資等等，質疑當局做法係同區議會作對。而沙田區議會主席程張迎日前就話，有區議員可能因為同民政處合作得唔愉快而否決撥款。程不滿政府今次嘅決定；又擔心未來區議會同政府關係更加對立，民政處會有更多項目會繞過區議會進行喎。
查實掛唔掛聖誕燈飾，影響到嘅只不過係節日氣氛，但若果政府同今屆區議會繼續抱住互相對抗嘅態度，最終受害嘅始終會係一眾市民。
卓妮