中環出更：建立品牌貼士 余富強：勿失信於消費者
經營一個品牌，假如想客人記住，就要做好品牌銷售同形象管理。香港管理專業協會客座教授余富強分享點樣透過強化品牌戰略執行力提升品牌體驗，佢認為最緊要係信任度，尤其係中國人好講信譽，如果失信於消費者，就好難回復關係。
香港品牌發展局聯同香港中華廠商聯合會尋日舉辦企業培訓工作坊，余富強係其中一位講者。佢話客人對產品忠誠度係品牌資產之一，佢哋要了解產品，購買產品後體驗同感受吓好壞，如果唔符合期望就唔會再買，買咗至少3次後就會成為忠誠客戶。
余富強話要建立一個品牌，就要配合實在同有效嘅市場營銷計劃，但係千祈唔好以為搵明星拍廣告就得，真正成功方法要不斷思考點去改良產品，如果長遠發展得有規模，就可以擊敗對手。至於財政預算方面，佢話投放幾多資金喺媒體上，要思考背後效益同係咪物有所值。
劉仁：用戶社交網分享建口碑
健康產品集團嘅創辦人蔡志輝喺4年前開始使用跨境電商發展業務。佢解釋，跨境電商係指買賣雙方喺唔同國家透過網絡同電子商務平台，進行交易同支付，由跨境物流交遞商品完成買賣。佢話公司以專注產品質量、優勢同口碑作為賣點，公司會選用內地大型電商平台，由於覆蓋率高、系統完善，加上資源充足，有助維繫現有客戶同有利開發潛在客戶。
鐘錶公司首席運營官劉仁就話公司借助社交電商喺市場上取得一定成就，又話透過用戶分享傳播產品，形成口碑效應，從而刺激消費模式，因為內地消費者重視評價，所以進行市場調查非常重要，了解市場同消費者品牌訊息搜集同購買行為，再整合性市場溝通，配合線上線下店舖結合，清楚界定每一品牌嘅承諾價值同管理品牌體驗，培養同提升團隊嘅品牌。
卓妮