政情：中環出更：接觸人多怕中招盧偉國檢測求心安
疫情來襲，病毒不長眼，所以工程界議員盧偉國都要急急腳去做檢測，隔咗兩日收到短訊通知，好彩無確診！不過盧偉國話經常接觸各方人士，唔排除日後定期進行檢測，等自己放心啊。
自行採樣未必個個識
因應爆發第4波疫情，政府加強病毒檢測工作，增設派發深喉唾液樣本收集包。盧偉國早前去到大埔賽馬會診所領取樣本包，話自己作為議員，成日要接觸唔同人士，因此有責任要自覺進行檢測，同時亦希望了解檢測安排。
盧偉國認為安排大致簡單、暢順。之不過需要經漏斗將唾液吐入細小嘅樣本瓶，盧話要專程搵把鉸剪，剪開漏斗口，要坐低搵個地方慢慢處理。盧偉國話好彩自己跟足指示，都冇撞板，但認為未必個個識吐深喉唾液，側邊又冇醫護人員幫手，擔心會影響檢測嘅準確度。
隨着疫情持續，盧偉國話唔排除日後定期進行檢測，保障自己同家人健康。但都希望政府採取更強硬措施，例如要求進行全民檢測，令疫情受控，盡快恢復正常生活。卓妮