政情：中環出更：梁榮武：藍天雖重現地球暖化
疫情衝擊全球經濟活動，工業生產同交通量都大減。香港天文台前助理台長梁榮武早前出席「香港綠色建築週2020」，期間佢提到城市雖重現蔚藍嘅天空，然而空氣乾淨咗會令到唔少人產生錯覺，以為碳排放應該一同減少咗，但其實碳排放嘅上升幅度只係有所放緩，地球暖化嘅趨勢仍然未能扭轉咁話。
地球愈來愈熱，主流科學理論都歸咎於人類經濟活動所產生嘅碳排放，不過有一種意見認為，二氧化碳嘅多寡同氣溫高低並無關係，直指全球暖化係一場騙局。梁榮武就對呢種講法感到無奈，佢話溫室氣體、全球氣溫等等嘅數據都顯示地球暖化係毋庸置疑嘅事實。佢又呼籲大家唔好以為香港係福地，就冇咗危機意識。因為香港冇能力自給自足，當其他地方嘅農業收成受到極端天氣影響，香港同樣會受糧食短缺危機威脅啊。
受氣候暖化影響最深者莫過係下一代人，少年氣候行動家劉衍一（Lance）指出，如果人類繼續浪費能源，令到全球平均氣溫比起工業革命前上升超過兩度，地球同人類將會陷入無法逆轉嘅地步，好多地方會被淹沒，原本只出現喺熱帶地方嘅傳染病都會全球爆發。所以佢促請大家要坐言起行，減少碳排放，切勿禍延後代。自細就好鍾意飲牛奶嘅Lance話，依家佢已經改飲荳奶同燕麥奶，而佢爸爸亦受到感染，開始投入素食嘅行列添。
麥偉林教小朋友用廢物整玩具
環保意識需要自細培養，「環保爸爸的設計生活」創辦人、玩具設計師麥偉林（Norman）話小朋友經常央求要買玩具，但新玩具到手之後，好快就束之高閣，非常浪費。於是佢開始教小朋友用廢物自製玩具，環保得嚟小朋友又有一個空間發揮創意。佢話當小朋友玩厭咗個自製玩具，可以化整為零並分類收納，留番日後再組裝其他玩具。Norman話依家都會同小朋友行玩具店，但小朋友唔再係買玩具，而係影低心儀嘅玩具，返到屋企再自己一手一腳做番出嚟啊！卓妮