政情：房會首開Zoom會議 麥美娟臨尾8分鐘現身
因應本港爆發第4波疫情，立法會亦因時制宜，尋日就首次利用線上會議軟件Zoom召開房屋事務委員會喇。雖然係新嘗試，但與會嘅議員看來都係科技能手，未見有咩蝦碌場面，唯獨有議員於會議結束前8分鐘先至現身。由於隔空開會，每位議員身處嘅地方都唔同，有人係議員辦事處設視像；有人就只得白牆做背景。
涉及過渡屋資助計劃
房屋事務委員會昨日舉行Zoom非正式會議，聽取運輸及房屋局局長陳帆就《施政報告》作出簡報。會議涉及過渡性房屋項目嘅資助計劃，以及為輪候公屋超過3年嘅人士提供現金津貼。會議上，幾乎每位議員都用盡4分鐘問答時間，至於議員麥美娟就喺會議結束前8分鐘壓軸出場，就連主席張宇人都要叫聲娟姐，果然係最重要嘅永遠都最遲出現呀！
後來麥美娟解釋，原來佢本身有其他會要開，所以就遲咗報到囉！睇嚟麥議員真係貴人事忙，都仲願意抽出寶貴嘅8分鐘參加會議，認真盡責呀！