中環出更：主婦疫下擔子重 劉仲恒：可拍片互相打氣
疫情肆虐，好多人嘅生活模式都起變化，當中尤以婦女為甚。婦女事務委員會（婦委會）成員劉仲恒（Kevin），就指唔少家庭主婦，既要應付日常家務，又要照顧兒女嘅線上學習，若果兼顧埋居家工作的話，擔子之重可想而知。想話相約好姊妹飲茶見面傾訴心事，但又遇上政府收緊社交限制！
儘管疫下嘅生活壓力較往常沉重，不過總有應對之道。Kevin話近日佢同太太就趁住布置聖誕樹而諗出一個親子活動，就係要求家中嘅小朋友親手製作樹上嘅掛飾，雖然小朋友嘅手工作品比唔上店舖售賣嘅貨色，但就勝在別具稚趣。布置完聖誕樹，當然唔少得聖誕禮物啦，Kevin就用手機拍低大仔選購禮物嘅情況，仲順便記錄埋小朋友講述送禮物嘅對象，以及挑選禮物嘅理由。講起拍片，Kevin就話婦委會現正發起一個名為「婦女同心‧疫境同行」嘅短片募集活動，歡迎婦女以照顧留喺家中嘅小朋友、為家人安排居家活動、為長輩制訂保持健康的鍛煉活動、及為照顧者安排專屬時光等題材，拍攝為時一分鐘嘅短片，然後上載到婦委會嘅專設網頁，向公眾分享之餘，亦同時為各位姊妹打打氣，發放正能量。
香港藥學會會長龐愛蘭（Scarlett），家中雖無小朋友或長者要照顧，但佢話身邊總係有人需要多加關懷。
龐愛蘭：得閒會同契媽傾吓偈
Scarlett話佢有一位年屆八旬嘅契媽，向來都活躍於教會嘅活動，但教會嘅聚會都因疫情而取消，再加上多個月來居家避疫，以及個仔盤生意受不景市道嘅衝擊，老人家難免感到抑鬱，所以Scarlett一有空檔，都會約契媽見面傾偈。Scarlett相信以民間嘅智慧，因疫情而產生嘅各種問題都可以解決，如果姊妹們有值得借鑑嘅親身經驗，就不妨拍片同大家分享一下。
疫情影響所及，就連慈善機構嘅運作都受到妨礙。健康快車創會主席方黃吉雯，就指內地嘅控疫措施相當有效，健康快車喺內地已重投服務；不過香港嘅疫情就相當反覆，以致機構喺香港嘅運作仍然未能恢復咁話。
卓妮