中環出更：疫下四眼族增 林順潮：度數加深眼疾隨身
儘管患上近視喺港人當中十分常見，但眼科醫生林順潮依然呼籲大家，最好避免成為「四眼一族」，而若果真係驗到有近視，都盡量唔好畀度數加深，否則會增加其他眼疾嘅風險o架。
傑出青年協會（傑青會）、亮睛工程慈善基金以及其他團體早前聯手舉辦一個護眼活動，向學生宣揚防疫同護眼知識。作為籌委會主席嘅林順潮，就指時下好多人手機不離手，加上疫情肆虐，無論公司開會又或者學校授課都改為網上進行，雙眼接觸螢幕嘅時間驟增。林順潮話有數字顯示，自疫情開始後近視患者數目快速上升，因此建議大家3招護眼，包括閱讀要有適當距離、每10分鐘要望遠方物件，同埋要確保有充足光線。
籌委會聯合主席袁國禮醫生就指，雖然近視係有遺傳因素，然而都市化嘅地方，建築密集少有遠景觀望，都係後天患上近視嘅一大成因。袁醫生話自己童年就喜歡閱讀然而忽略護眼，小學時代已經成為四眼一族，後來為應付大學考試而挑燈夜讀，結果近視度數喺兩個月就加深成百度。袁醫生提醒各位學生哥，眼睛同知識都係伴隨一生，所以努力讀書之餘都要懂得護眼。有份出席活動嘅牙醫陳健強，就話據統計數字，約莫40歲就會開始出現老花，而佢自己亦因老花而加入四眼仔嘅行列，但由於平時做牙科手術都要戴護目鏡，所以冇話唔習慣。
余嫿貪靚恨戴眼鏡
雖然醫生千叮萬囑，不過亦有人好想戴眼鏡喎。傑青會前主席余嫿，就話自己中學時期好想戴眼鏡，覺得好靚，讀大學時因為怕影響室友睡眠，每晚溫書都唔敢開太多燈，結果光線不足終成四眼妹，不過戴眼鏡之後先至發覺甚為不便，依家諗番起都有啲後悔喎。
卓妮