疫情失控，政府早前宣布收緊防疫措施。隨立法會主席梁君彥縮減大會議程後，建制派尋日開會討論係咪取消各事務委員會會議；雖然內務委員會同財務委員會如常展開會議，但議程有唔同程度嘅壓縮。據悉，會議上有議員提出進一步壓縮所有會議嘅議程，包括將《施政報告》政策簡報會合併討論，目前同梁商討緊具體操作同會議日期。
立法會秘書處喺本月2日至15日實施在家工作，如果立法會需要召開任何會議，秘書處要調配人手到大樓辦公。為降低傳播風險，有議員建議將各委員會嘅《施政報告》政策簡報會喺下周合併討論，盡量喺一至兩日內商討完畢。據悉，會議上冇建制派反對合併討論，但部分委員會有急切議程，所以都要召開會議。
據立法會日程安排，房屋事務委員會下次會議討論過渡性房屋項目嘅資助計劃，同埋為輪候公屋超過3年嘅人士提供現金津貼試行計劃。該委員會副主席柯創盛（柯仔）話，因議程具有時效性，主席張宇人諗緊會唔會召開會議，唔排除更改會議日期以方便秘書處編排人手。柯仔又話疫情變化難以預料，衞生事務委員會亦可能要召開會議。
衞生事務委員會主席葛珮帆話因疫情嚴峻會暫停召開會議，但唔排除日後召開會議審議包括新冠肺炎疫苗進展等緊急事項。實際上，事務委員會主席有權召開委員會會議，但據聞建制派有共識唔會舉行公聽會等活動，以避免人群聚集。
卓妮