【本報訊】無業漢涉嫌將3個月大的女兒「焗死」案昨天在高院續審，控方在法庭讀出被告事發後發短訊給妻子的內容，他不但責怪妻子懶理女兒「周圍去玩」，直斥妻子是害死女兒的罪魁禍首，更代死去的女兒斥責她：「就係因為妳一個自私嘅決定，害死我同爸B一生，妳究竟有冇一丁點嘅內疚？」不過，她在法庭表示她只是跟朋友「出去輕鬆下」，又說：「我已經日日照顧小朋友，我由一個好貪玩嘅人，變成坐喺屋企煮飯湊小朋友嘅人」，強調她出夜街的次數「5隻手指都數得晒」。
42歲被告張應輝，被控於2018年8月22日在香港謀殺其女兒張嘉雯。被告的妻子盧殷童繼續作供，她透露曾因本案涉嫌誤殺被捕，警方及後循疏忽照顧兒童罪調查，但最終無條件將她釋放。
她供稱，她發現女兒死去當日，致電被告追問他為何要用枕頭被鋪蓋住女兒，並表示打算報警及通知家人，她只記得被告當時語氣緊張，說了幾句便掛線。控方庭上播放當日她致電999報警的錄音對話，她嗚咽着向救護員表示：「我先生喺屋企焗死咗個女，佢搵兩個枕頭同張被焗死個女，佢依家唔見埋。」
盧供稱，在案發一個多月後，被告繼續發訊息給她，責怪她「本來好好一個家畀妳搞散晒，妳安樂啦」，「冇咗個女，依家開心啦，唔使再畀自己藉口有幾大壓力，鍾意去邊度玩就去邊度玩，就算個女喺度，妳都係唔理佢，周圍去玩」，「妳將所有嘢都推晒畀我，就算呢件事冇發生，遲早個煲都會爆，呢啲係我同妳講嘅最後說話，妳以後要好自為之」，「點解個個淨係識怪我，可憐妳，妳有幾可憐？妳先係罪魁禍首，害死個女係妳」。案件編號：HCCC 253/2019