新一份施政報告前日公布後，尋日各個政策局就陸續召開政策記者會，解釋細節。話說喺教育局同創新及科技局嘅記者會上，傳媒都聚焦於教育問題，不停咁問教育局局長楊潤雄問題，搞到創科局局長薛永恒被冷落，要自己衝出嚟請傳媒問佢問題呀！
話說喺記者會上，傳媒都主力問楊潤雄問題，例如通識教育嘅改革。問完一條接一條，終於喺楊潤雄答完其中一條問題後，薛忍唔住啦！佢拎起咪講，指市民其實對創科都好關注，創新科技對社會發展都好重要嘅，呼籲在場記者問佢問題。聽到呢句，楊潤雄仲笑咗一聲添！原來薛永恒喺講完開場白之後，已經好安靜咁坐咗半個鐘「冷板櫈」，無人問過佢問題。
喺薛永恒硬銷自己後，在場嘅新聞官隨即邀請記者問吓薛永恒問題，於是就有兩位記者發問，但問完之後，跟住啲問題又返去教育方面，薛永恒都只好繼續默默咁坐喺度喇！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
