中環出更：張宇人促引入海外醫生 政府揚言打和平無硝煙嘅仗
公營醫療系統醫護人手嚴重不足，議員張宇人尋日再促請政府盡快制訂機制、法例以引入海外醫生，認為唔應被醫委會阻撓有關事項。特首林鄭月娥對此表示認同，同時表明未來會同本地醫生討論，務求搵出平衡各方嘅方案。
盼與醫學界對話 討論方案
林鄭表示，過往佢喺醫學院致詞時都講過，支持放寬海外醫生返港行醫，惟實行有一定困難，希望本屆政府任期內能為市民爭取福祉，徹底處理問題。但佢強調呢趟係要打和平無硝煙嘅仗，絕對唔想同本地醫生引發大衝突，盼未來希望能夠與醫學界對話，討論可接受嘅方案，局部容許海外訓練同具有執業資格嘅港人醫生返港行醫，解決本港醫生不足嘅問題。
此外，林鄭又提及有特別需要嘅學前兒童，指現時衞生署聘請唔到足夠嘅兒科醫生，令呢批小朋友無法享有應有嘅服務，效果並唔理想。故未來會積極研究引入海外醫生，唔會「閂咗個門」咁話。卓妮