中環出更：立會答問大會悶到飛起 議員官員瞓覺玩手機
《施政報告》發表之後，尋日特首按例都要到立法會出席答問大會。然而欠缺民主派嘅議事堂，沸沸揚揚嘅場面不再復見，連帶答問大會都冇乜火花，儘管內容同港人利益相關，不過無論在座席嘅議員或官員都呵欠連連，各自拎出手機瀏覽廣闊嘅網絡天地。
尋日嘅答問大會歷時約莫個半鐘，喺呢段同一場足球賽事相若嘅時間裏面，有人選擇玩筆、亦有人係咁抄寫，不過最常見嘅都係不停咁篤手機，而議員陸頌雄就聚睛於阿根廷球王馬納當拿逝世嘅消息，一代球壇名宿突然隕落，當然要望多兩眼啦。體文界議員馬逢國就利用手機睇新聞，不過有部分議員就選擇「偷偷摸摸」，喺枱底先至用手機，唔知係咪怕被影到呢？而喺公眾席旁聽嘅發展局副局長廖振新就透過手機嚟操作同銀行相關嘅應用程式。
邱騰華姚思榮密密斟
另外，亦有議員疑似抵受唔住形同催眠嘅環境，包括進出口界黃定光、飲食界張宇人、工聯會黃國健等都顯得眼皮重重，懨懨欲睡；除咗佢哋，連部分坐喺公眾席旁聽嘅人士都難敵睡魔急Call，相繼瞓着咗。
其實喺答問大會開始前，大家都好精神o架。唔少官員進入會議廳都冇即刻埋位，反而係同一眾議員閒聊，其中商務及經濟發展局局長邱騰華就同旅遊界議員姚思榮密密斟，近日旅遊氣泡咁多波折，唔知佢哋嘅話題係咪圍繞住旅遊氣泡呢？而政務司司長張建宗就同議員張國鈞傾偈。不過議員周浩鼎同梁志祥就姍姍來遲喇，喺宣布特首進場前一刻先現身會議廳。至於冇跟隨民主派總辭嘅兩名非建制派議員，熱血公民鄭松泰同埋醫學界陳沛然都有出席會議，但鄭喺10幾分鐘後就離場，而陳沛然就「有幸」同特首對答。
此外，尋日大部分官員嘅座位同前日有別，其中勞工及福利局局長羅致光由第2行搬上第3行、創新及科技局局長薛永恒同運輸及房屋局局長陳帆互換、財經事務及庫務局局長許正宇由第4行中間搬到最右邊。突然咁樣換位法，到底有咩含意呢？卓妮