今日係職安健問答常識比賽舉行嘅日子，阿健同阿珍一早到達比賽會場，二人均信心爆棚。阿健：「今年比賽我哋一定要攞冠軍呀！」阿珍回應：「定啲嚟，對於職安健常識我好有信心，唔信你隨便抽個題目考吓我。」阿健問：「咁你講吓足底筋膜炎嘅成因呀。」
阿珍回答：「簡單啦，足底筋膜炎嘅成因有好多，例如工作時長時間站立或行走，穿着唔適合嘅鞋，又例如鞋底過硬或鞋跟過高等，又或者經常攜帶重物增加足部負荷，而其他因素亦包括過胖或有扁平足等。」阿健讚嘆：「識嘢喎，咁從事咩行業嘅人會較易患上呢個病？」阿珍答：「需要長時間站立工作或行走嘅行業，例如售貨員、保安員、教師或送貨員等。唔好考我住，你又知唔知有咩預防方法呀？」
阿健說：「最簡單嘅預防方法係避免長時間站立工作或行走，如工作性質是可以坐着進行，僱主就應該提供合適座椅畀僱員坐低工作。如果工作性質或者位置唔許可，僱主可以喺工作位置附近或者休息區提供合適椅子，讓僱員喺情況許可或者小休時坐吓。」
阿健續說：「工作安排方面，如持續站立工作2至3小時就需要為僱員安排10至15分鐘坐低休息或做足部運動。另外，保持適當體重、減少攜帶重物同利用手推車運送貨物都可以減輕足部承受嘅壓力。仲有要着舒適同輕便嘅鞋開工，例如鞋底較軟、吸震能力佳嘅鞋，同埋避免着高跟鞋。」
阿珍說：「唔錯，係喎，你報名嗰陣填咗邊個做隊長？」阿健答：「我無報名呀，唔係話你負責報名咩？」阿珍苦惱：「唔知依家即場報名得唔得呢……」
職業安全健康局
www.oshc.org.hk