政情：撤特權法查反修例 梁美芬：已過黃金時機
紡織及製衣界議員鍾國斌同另一位議員梁美芬，兩人早喺舊年11月提出引用《立法會（權力及特權）條例》（特權法），成立專責委員會調查反修例風波。之不過，繼鍾上個月撤回有關動議後，梁日前亦主動撤回一項類似嘅動議。梁就話，同其他建制人士商議後，覺得已經錯過調查嘅「黃金時機」，故決定撤回喎。
話要集中處理民生議案
梁嘅議案係主力調查反修例風波嘅前因後果，包括是否涉及外部勢力干預，以及過去多場大型示威嘅資金同物資來源等。據了解，有關動議喺建制陣營內未獲高度支持，加上有建制中人認為實施《港版國安法》後再無必要，有關動議遭撤回屬意料中事。
梁就解釋，覺得依家已經錯過調查反修例風波嘅「黃金時機」，決定先撤回動議，但強調未來可能會再提出類似議案。佢又話，依家應集中處理民生相關嘅議案，認為值得騰出議會時間，讓路畀更加重要嘅議題，例如教育、土地，以及改善選舉投票機制等。