政情：建制議員官員扯貓尾 避風塘議案撤回了事

得到兩位局長承諾會處理

議員何俊賢（高佬賢）早前提出討論成立關注避風塘與碇泊處相關事宜小組，直指現時避風塘以及碇泊處有3大問題！首先，小船喺碼頭上落客之後，並無適當嘅繫泊設施，過往就因此而發生唔少意外；第二，現時避風塘未設立分區，貴價遊艇以及工程船、漁船停泊喺同一個區域，容易發生碰撞最終要搞到對簿公堂；第三，根據海事處早前資料，本港私人繫泊設備數目有超過1,900個，但反觀避風塘咁多年嚟都並無增加數量，令到市區嘅避風塘過分擠迫，但部分避風塘例如喜靈洲，因為太過偏僻而無人問津。喺前年超強颱風山竹襲港期間，更有一艘價值幾千萬港元，長逾38米嘅豪華遊艇喺西貢海濱長廊嘅防波堤擱淺，歷時4個月都無人處理，地政總署遲遲先至發出通告要求移走有關遊艇。

尋日高佬賢之所以自行撤回建議，原因並非係跟進有關問題多年，政府踢極唔郁而心淡，而係上個星期佢同「雙局」會面，分別係運輸及房屋局局長陳帆同食物及衞生局局局長陳肇始，向兩人陳述現時避風塘以及碇泊處面臨嘅問題，得到兩個局長都應承會責成屬下部門處理。高佬賢解釋話，喺立法會成立小組討論，未必有相關資源處理，又會浪費半年時間討論，倒不如直接交由部門跟進，就可以大大節省時間喇。

若不兌現 高佬賢「三倍奉還」

之不過，眾所周知政府成日得把口，兼且習慣歎慢板。雖然話就話應承咗先，但去到真正落實永遠都係遙遙無期，甚至最後唔兌現承諾都唔係新鮮事。所以高佬賢並無輕易收貨，公開喺會上強調，口頭承諾建基於雙方信任，若然雙局並無認真處理有關事宜，將會「三倍奉還」啊！言下之意就係會好好「招呼」陳帆同陳肇始，例如會先於委員會重開小組、再喺立法會進行質詢，仲揚言「下次嚟我見到你，啲嘢就會睇得緊啲囉。」

泛民總辭之後，剩番建制派嘅立會就變成一言堂，依家去到私下傾談就唔使擺上枱討論，咁仲講乜嘢監察政府呢？