政情：劉國勳延任立會資格 再受挑戰
區議會（第一）功能界別議員劉國勳（阿勳），舊年爭取連任北區區議員失敗後，佢喺原定今年9月舉行嘅立法會換屆選舉中，並無參選資格。之不過，由於政府早前押後選舉，阿勳同其他立法會議員一齊延任，但其資格一直備受爭議。繼早前有北區區議員發起聯署要求阿勳辭職，有深水埗區議員仲打算喺早兩日召開嘅會議上，討論反對阿勳代表該區議會出任立法會議員。
區議員擬動議反對 民政專員否決
話說深水埗區議員冼錦豪原本打算喺本周二開會時動議，反對阿勳代表第6屆深水埗區議會出任立法會議員，但有關議程被該區民政事務專員否決。
該區區議員何啟明批評阿勳已經唔再係區議員，喺區議會（第一）界別並無投票或參選嘅資格，質疑佢憑咩繼續代表業界，仲講笑話阿勳嘅黨友、同屬深水埗區議員嘅劉佩玉比阿勳更有資格出任呢個議席添！