中環出更：玩大富翁學理財 陳景邦：謹記唔好破產
社會潮流變遷極其迅速，但有啲遊戲經得起時代考驗，講緊嘅就係大富翁，唔少人都係由細玩到大，「大富翁85周年香港大賽」賽事營運總監陳景邦（Gary）話以前5兄弟姊妹逼喺狹小嘅公屋一齊玩大富翁，但一路都以為只係可以4個人玩，次次都要爭餐懵，不過回想起都覺得係一個美好嘅回憶。
大富翁唔單止係一種娛樂，投入其中仲會有唔同嘅啟發。卓妮早前出席大富翁85周年香港大賽啟動禮，Gary分享喺遊戲之中學到理財，話細個玩大富翁嗰陣要謹記唔好破產。雖然透過遊戲識得「借錢」，之不過就未養成履行還債責任嘅概念。自小已經成為大富翁粉絲嘅Gary話，尤其鍾意大富翁具有各式各樣嘅版本，所以長大後從事旅遊業，周遊列國都不忘把握機會物色當地版本嘅大富翁，喺過去30年已經收藏咗大約300至400副大富翁，仲要搵兩個大書架陳列添。
同樣認為大富翁係童年回憶嘅仲有旅遊業議會主席黃進達（Jason），不過佢話父母工作繁忙，當時只可以同細佬妹或者朋友一齊玩，成班人一齊玩就最開心。Jason同樣會留意唔同地方版本嘅大富翁，覺得棋盤所列嘅外國街道名好有趣，之不過地皮就買唔起喇。但因為爸爸開設旅行社，自小已經成日跟隨爸爸去外國出差，就會喺當地搵番大富翁棋盤上面標示嘅著名景點，了解一下實地嘅風貌。
姚柏良為環遊世界奮鬥
旅遊業監管局業界成員姚柏良（Perry）話細個家境清貧，但擁有一個環遊世界嘅夢想，希望有足夠財力可以周圍去、周圍睇，至今仍然為呢個夢想努力奮鬥緊㗎。Perry到依家都會同一對仔女玩大富翁，成為家庭樂嘅活動，話呢種實體遊戲可以避免小朋友過分沉迷電子遊戲，令仔女多啲同人溝通，仲可以自小培養如何做決定，因為喺遊戲中每行一步都會影響最後嘅結果，所以唔可以「行差踏錯」㗎。
卓妮