中環出更：暴疫夾擊 社會停滯不前 麥美娟籲政府勿閉門造車
本港新冠肺炎疫情已歷時近九個月，但仍未完全受控。議員麥美娟（Alice）尋日喺電台節目中話香港經歷反修例風波同埋疫情，失業率持續上升、社會停滯不前。佢話政府唔應該喺香港面對困難嘅時候「閉門造車」，強調政府必須同公眾接觸，以聽取意見同埋接受市民批評。
Alice喺節目中話，外國用應用程式、追蹤器同健康碼等高科技手段控制疫情，發揮咗一定作用。佢預料香港未來冇可能完全擺脫新冠肺炎，促請港府倣效外國，利用新科技控制疫情，讓跨境家庭、旅遊業、工人等盡快可以喺安全嘅情況下開工，以緩解失業率嘅上升。
倡向市民派發消費券
就短期計劃而言，Alice建議政府向市民派發消費券，以刺激市場上嘅食品、零售等行業；長期計劃方面則建議政府改革香港經濟結構，佢仲批評香港過度依賴第三產業，話政府應該促進生產結構嘅多元化。Alice仲強調社會正處於艱難嘅時期，政府應該為社會帶來希望、同公眾接觸，而唔應該「閉門造車」囉！
卓妮