中環出更：兒時中秋愛露營 梁天富嘆過節氣氛不如前
中秋節就快到，又係家人聚埋一齊賞月嘅好時光。善德基金會副主席梁天富（Eddie）回憶舊時歡樂時光時就自爆，話中學時中秋節都會約埋朋友仔去露營玩成晚。卓妮梗係即刻追問有冇約女仔一齊去啦，雖然佢冇正面回應，但就笑住咁話「窈窕淑女，君子好逑，中秋係一個好日子」。
卓妮尋日喺沙田馬場見到Eddie同香港小母牛籌款委員會成員鄧慶治，Eddie話好懷念以前一家人過節嘅情景，佢話屋企兄弟姊妹多，但從來都唔會爭月餅食，諗番起一齊食芋頭同楊桃嘅場面都覺得好開心。不過時移勢易，佢話依家主要都係出去食飯，切個月餅就算，感嘆中秋氣氛已不如以前濃厚。
已故麗新集團主席林百欣嘅養子林建康（Matthew）同太太黃寧艷，早前被傳今年初喺英國探望囝囝時染疫，幸好現已康復。兩夫婦亦入咗馬場，見佢哋同朋友有傾有講，精神相當唔錯。Matthew話兩個囝囝已經喺英國返咗香港，今年可以一家人過中秋。佢又提到每年中秋節都收到好多月餅，奈何月餅膽固醇太高，笑指自己「冇quota」，屋企人又怕肥，但又唔想浪費，所以會將啲月餅送畀人。
蕭楚基細個貪玩煲蠟
自製燈籠相信係唔少人嘅童年回憶，咁啱見到懲教署社區參與助更生委員會主席蕭楚基同佢朋友關佐仲，蕭楚基話細個最鍾意整兔仔同楊桃形狀嘅燈籠。佢仲話試過唔小心燒着晒啲燈籠，亦貪玩去煲蠟，但佢都知咁樣好危險，所以叫大家唔好亂咁玩。至於依家會點樣過節？佢就話最鍾意一邊食月餅，一邊歎番杯茶，咁樣食得多都唔怕滯喎，加上政府放寬限聚令，佢已經計劃同屋企人出去食飯慶祝中秋節。
卓妮