政情：公民講場：食署離地 街市Wi-Fi自動斷線 電子支付玩殘檔主

政府近年來口口聲聲話要推動香港成為智慧城市，近日就趁住市民嘅衞生意識有所提高，政府打算提供一筆過資助，鼓勵食環署轄下街市使用電子支付，八達通公司亦願意向檔販提供優惠，然而反應並唔踴躍。原來食環街市嘅Wi-Fi使用機制，係每小時都要重新確認一次，否則就會自動斷線，對於必須連線上網至可以操作嘅八達通收款機，非常不便。其實食環署有意配合推廣電子支付，作為署長嘅劉利群，係唔係事先都應該檢視轄下街市嘅Wi-Fi使用機制呢？決策咁冇智慧，又點推動香港邁向智慧城市呀？