今屆立法會延任不少於一年，作為「主留派」嘅民主黨立法會議員，早前話過會遵從民調結果決定去留。而七十幾位包括抗爭派在內嘅區議員就發起聯署，表明杯葛違反憲法嘅議會，同時拒絕非法委任，又打算邀請民主派立法會議員參與會面，期望透過坦誠交流尋求共識。
一直提倡總辭嘅抗爭派喺聯署信提到，全國人大單方面決定將委任第六屆立法會全體議員延長任期「不少於一年」，無疑係違反《基本法》，如果咁多位議員一旦接受延任，即係認可並授權畀中央違憲嘅機會，中共大可以藉此向外宣稱延長任期嘅決定合憲合法合理。
聯署信又指建制派佔多數議席，加上政府不斷干預，民主派根本就無可作為。中共押後選舉，阻止民主派奪取多數議席，被委任嘅少數民主派議員，能夠作為嘅空間可以話十分有限，期望議員就留任一事三思再決定。
其實民主派議員對留任與否亦存在分歧，議員陳志全同朱凱廸，講到明拒絕接受延任，其中陳志全早前發信通知職員，話佢嘅議員辦事處今個月三十日就會結束，希望同事早日搵到理想工作，而朱凱廸就話會同陳志全共同進退。