政情：倡施政報告重推垃圾徵費 環團聯署：部門應加強協調
政府將於下個月公布施政報告，有環保團體聯署建議政府實施強制性垃圾徵費，而且建議各個政策局制訂政策嗰陣，應該加強協調咁話。
醞釀15年 因拉布難產
垃圾徵費計劃醞釀咗十五年，原本有望喺今年年底落實，但因為泛民議員拉布而胎死腹中，意味草案需要推倒重來。適逢施政報告公眾諮詢嘅機會，十五個環保團體尋日聯署提交建議，希望政府盡快推行垃圾徵費計劃、塑膠容器生產者責任制，以及完善廢物回收系統。
政策本身固然重要，但推行政策嘅過程同樣重要。環保團體認為政府各個政策局制訂同實施政策嗰陣，應該加強協調同參與，以實現清晰而一致嘅長遠願景。環團仲建議應該規劃疫情下嘅經濟刺激方案，把握綠色復甦嘅機遇，例如增加使用可再生能源，為本地低碳經濟行業提供相關培訓，同時開拓就業機會。
唔單止要加強政府內部溝通，環團認為政府需要同本地智庫、公民社會成員等緊密合作，保持雙向溝通以了解民情，令香港成為零碳排放嘅社會。睇嚟有關團體都認為政府推行政策嗰陣似乎太過閉門造車，應該要溝通多啲先啱喇！