政情：港府財赤 許正宇：睇餸食飯
政府就施政報告公眾諮詢採取新模式，喺網上收集意見後，各局長會拍片解答市民問題。面對巨大財赤，財經事務及庫務局局長許正宇就話要睇餸食飯喇。
送出冧巴「1014」
疫情為香港經濟帶嚟嚴重衝擊，政府財政預算赤字擴大至超過三千億港元。許正宇被問到看管政府夾萬，有何理財之道？許嘅回應相當精簡，就係「睇餸食飯」四個字喇。不過許對香港經濟前景仍然充滿信心，佢深信香港過去久經風浪，每次都可以重新企起身，更加可以搵到新定位。許用沖奶茶做比喻，話每間舖頭都有自己嘅獨門秘方，只要水滾茶靚就自然會有客人幫襯，但就無透露自己手握住啲咩秘方喇。
對於有市民搞笑咁建議畀個股票冧巴揸手，許正宇話應該留番畀股評人講，但佢都願意大方送出個四個字嘅冧巴，就係「1014」，原來佢係搞爛Gag，趁機大賣廣告，叫市民關注十月十四日公布嘅施政報告。