政情：選立會50萬開支 鄧飛1毫都唔使畀

費用全由教聯會找數

唔少參選人陸續向選舉事務處提交選舉開支申報，原本打算出戰教育界嘅教育工作者聯會副主席鄧飛就使咗超過五十萬元，當中以選舉廣告開支佔最多，用咗約三十七萬元，印刷八萬份郵遞小冊子用咗十五萬元，而拍攝一段三分鐘嘅參選片段就價值九萬八千元。睇嚟佢真係落足本錢幫自己宣傳，要增加知名度喎。

教育界登記選民人數約八萬五千人，除番開鄧飛嘅選舉總開支，即係每位選民價值約五元八角。但相關開支由教聯會以現金捐贈，即係鄧飛一毫子都唔使自己畀。

麥德正只用咗120元

有人花費數以十萬元計，但有人就好慳家。原本有意競逐區議會（第一）功能界別席位嘅東區區議員麥德正，佢申報嘅選舉總開支只係用咗一百二十元，都係用嚟影證件相；而報名參選保險界嘅李福納，選舉開支得大約三百元，全部用喺選舉廣告。莫非真係影吓相、印吓海報就足以應付選舉工程？

不過，節儉嘅唔止上述兩位。航運交通界易志明本身都爭取連任，但佢嘅選舉開支一千元有找喎。佢大部分嘅選舉開支都係幫架車入油，使咗七百五十五元五角，加埋其他雜費都只係使約九百元咋。而競逐連任嘅經民聯鄉議局功能界別議員劉業強嘅選舉開支就有二千三百多元，仲好節儉咁舊物重用，着番價值四十五元、舊嘅選舉人背心添！

另外，喺紡織及製衣界爭取連任嘅鍾國斌，都使咗將近五萬七千元喎。不過當中有五萬五千多元係聘用四人，擔任佢嘅選舉助理同拉票人。

其他人嘅開支主要用喺形象花費上，搵咗工作室影造型照，原本同樣參選區議會（第一）嘅大埔區議員任啟邦同參選商界嘅孫志恒，佢哋嘅選舉總開支分別用咗約七百同約一千七百元。