中環出更：梁君彥：法案爭議擺平才上立會
立法會主席梁君彥尋日出席一個網台節目，談及現時行政同立法關係時話，政府有責任處理問題，又話有法案唔掂嘅、有爭議嘅，政府應擺平先拎上立會；但相反如果法案「唔係咁惡」，議員就唔應該政治掛帥，仲指出依家最緊要嘅係重整經濟、處理疫情，而政治應放埋一邊囉。
盼各黨退一步 勿政治行先
問到行政、立法關係是否「低處未算低」？梁就話希望各黨派都可以後退一步、找尋出路；要為市民謀福祉，而唔係為政黨。另外，政府釋出善意嘅同時，泛民都應該跟隨，強調敵對態度冇任何好處。至於建制同泛民雙方對立，搞到無嘢講，梁有冇利用主席之位，令議員有商有量咁處理事情？梁憶述話，過去兩邊政見並非一致，但都會互相合作；就算立場不一，事後都有傾有講，但依家就完全相反，所有事情都政治行先。
梁又強調任何人都可以同佢溝通。梁舉例話，非建制派議員陳志全早前約佢商討任滿酬金事宜，佢都即刻會見，強調主席係中立嘅，建制派或自己黨友有做得唔啱嘅地方，佢都會立刻提出同制止。而未來一年，佢最大嘅挑戰係點樣令議員回歸初心，遵從《議事規則》辦事。而立法會復會後，將發表新一份施政報告。佢話議員未必鍾意聽，但市民可能想聽，希望可以畀特首、議員一個機會，等佢哋盡番應有嘅責任。
卓妮