笑看天下:窮人最怕冇得頂硬上

受新冠肺炎疫情影響,全世界失業率上升,歐美國家基層市民都嗌晒救命。試睇吓英國,對好多英國人來說,有工作才有地方住,但在疫情下,很多企業裁員,臨時性工作首當其衝,若然一時找不到新工作,意味着交不起房租,可能被房東趕走而無家可歸。疫情下英國政府規定房貸可暫緩繳交,也呼籲房東善待租客;問題係一旦疫情結束,租客要一次性付清欠下嘅租金,供樓者要一次過付清積累嘅房貸,對好多人而言,仍然係一個難解嘅困局。

回看香港,五至七月失業率為百分之六點一,失業人口逾二十四萬,重災區係飲食及零售業,呢啲行業嘅打工仔為咗生存,紛紛轉行至入行門檻低嘅保安業,勞動市場出現大洗牌。根據最新數字,截至今年六月底,逾三十三萬八千人持有效保安人員許可證,半年間急升逾二萬六千人,與近年每年平均增加約二千六百人相比,升幅約九倍。眾所周知,由唐樓到半山豪宅、學校、屋邨、商場、醫院、馬會等都需要保安員,之前長短期都有空缺,有啲屋邨、商場甚至長期貼上招聘通告。

當然,年紀較大嘅通常在一些唐樓或舊式大廈做看更;有些大型屋邨或中半山豪宅,對看更自然有更高要求,起碼年紀輕些,甚至懂得多少水電工程知識。據悉,近期入行多咗中年人,一些年紀較大嘅恐怕會被淘汰,有得揀,物業管理公司冇理由揀個七十歲嘅都唔揀個五十歲嘅!當然,日後若經濟環境好轉,一批較年輕嘅會流失,說不定七十歲保安仍然搶手!

由勞動人口大洗牌,老朽看到香港人依然有「獅子山下精神」,可以的話,千方百計去搵食都係靠自己,並不是人人伸手希望政府打救!老朽那一輩的人,六、七十年代時社會經濟還好,東家唔打打西家,窮咩?頂硬上囉,一人兼兩三職從不多呻!依家正職都難保,仲有兼職呢支歌仔唱咩!