政情：立會10‧14開始會期 施政報告同日提交
早前全國人大常委會裁定，香港立法會真空期將由現屆立法會延任不少於一年，港府尋日就刊憲公布，特首林鄭月娥指今年十月十四日，為現屆議會二○二○至二一年度一般會期嘅開始日，而林鄭月娥任內第四份《施政報告》亦會同日向立法會提交，喺翌日出席立法會答問大會。
明年2‧24發表財政預算案
立法會秘書處都喺尋日晏晝發出整個新會期嘅會議日期，指除咗特首答問會外，新會期內所有其他立法會會議都係上午十一點開始，除非主席另有決定。
文件顯示，撇除特首發表施政報告及其答問會，同埋三次財政預算案會議外，新會期將召開二十五次立法會大會，最後一次大會日期為明年七月十四日。另外，明年三月頭兩個星期亦會預留空檔，即係北京兩會召開期間，立法會冇大會會議。
文件亦都有列明，財政預算案將喺明年二月二十四日發表，而立法會財務委員會，就會喺明年四月十二日至十六日期間，舉行特別會議審理預算案。隨後就喺明年四月二十一日、二十二日和二十八日分別舉行第二次同第三次財政預算案會議。