政情：做埋政府嗰份 區議員街邊「抄牌」

話說深水埗兩名區議員袁海文同鄒穎恒，尋日去咗長沙灣「抄牌」。車主見到食「牛肉乾」，一定好驚，但唔使慌，查實佢哋只係攝張紙落去，提醒車主啫！

附近違泊問題嚴重

鄒穎恒話主要係深盛路、深旺道、荔枝角道同興華街西，呢幾條道路嘅違泊問題較影響居民生活，早前曾去信警務處同運輸署，亦喺區議會討論過好多次，但部門執法未夠積極，加上停車位唔夠，令問題一直無法改善，所以諗住靠「抄牌」提醒吓車主為人為己，保障道路安全，唔好再違泊。

袁海文就話警方只係交代咗向違泊車輛發出告票嘅數字，但唔能夠針對居民投訴，所以要繼續喺區議會跟進。佢又以尋日「抄牌」嘅情況為例，雖然有警員同交通督導員喺朝早九點幾真「抄牌」，但到晏晝五點幾再睇番，有部分車輛仲喺原位未離開，朝早張告票仲喺度，佢話啲車主當罰款係泊車費了事，又話其實宇晴匯都有公眾泊車位，車主絕對可以用，而唔係就咁泊喺路邊，影響行人安全。