政情：陳思靜深圳坐完疫監 自嘲高風險入境人士
早前返內地處理文書事務嘅元朗前區議員陳思靜，日前喺深圳完成十四日醫學隔離，佢話「出冊」離開酒店嘅時候要探熱同簽聲明，仲要隨身攜帶一張完成隔離嘅證明，遇到檢查的話就要出示，陳思靜又指自己目前係「高風險入境人士」，相信短期內自己嘅行蹤會被監控，不過就冇所謂喇，反正唔係嚟作奸犯科，話寧願畀國家監控，都好過畀外國政府掌握私隱。
埋單逾七千蚊人仔
陳思靜喺社交平台話，呢段日子無想像中咁難過，不過心理狀態一直都唔穩定，只係想快啲完成隔離。至於兩星期酒店隔離嘅費用，佢話住宿已經要三千幾，叫外賣就大約二千六百元，檢測費用就用咗一千元，車費就三百五十元，埋單都要成七千五百七十元人民幣。聽落都有啲肉赤呀，隔離要使咁多錢！
重獲自由嘅陳思靜又有啲咩節目呢？原來係去幫襯中醫做推拿，佢話每次做完啲骨頭都散晒，而痠痛情況就大有改善，不過最重要都係抽時間陪吓隻愛貓「茶茶」。陳思靜話有一段時間無見「茶茶」，瘦到得番棚骨，仲以為主人唔要佢添，結果喺確認完身份後，「茶茶」就開始食番嘢，再等「茶茶」身體穩定番啲就同佢沖涼，一盡貓奴嘅責任咁話。