中環出更：「口罩案」在身 疑畏罪潛逃 鄭家朗承認一度離港
前香港眾志常委羅冠聰喺《港區國安法》實施前潛逃英國後，有報道指前眾志副主席鄭家朗亦失蹤。鄭家朗尋日首度現身出席一個記者會，被問及有關事宜時，佢承認確實曾短暫離港，但「因牽涉到家庭同埋私人事務」，不便透露詳情。
對於唔少媒體報道指鄭家朗「畏罪潛逃」，佢話依家只「有一單口罩案喺身上」，又笑稱「唔知開咗呢個記者招待會之後，唔知國安法會唔會實行喺我身上面呢？」喺回應近日嘅報道，佢話：「佢哋（媒體）指控我潛逃，但我實際上依家喺香港，所以我就唔係潛逃嘅」。
五月曾遭海關拘捕
海關喺今年五月曾指眾志出售嘅口罩，涉嫌違反《商品說明條例》，並拘捕咗鄭家朗，其後佢獲准保釋候查。
喺港區國安法實施前，黃之鋒、周庭同羅冠聰宣布退出一手創立嘅眾志，而眾志其後更宣布解散同停止一切會務。另外，港府正通緝涉違國安法、流亡海外嘅六名港人，當中包括羅冠聰，而周庭早前因涉嫌違反港區國安法被捕，扣查後獲保釋，但被沒收旅遊證件。
卓妮