中環出更：樓市疫境企硬 葉景強：新盤銷情靠父幹
香港樓價貴絕全球，即使疫情為經濟帶來沉重打擊，失業數字上升，樓價喺逆市當中仍然企得好硬。物業投資專家葉景強（King Sir）日前出席一個問卷調查發布會，佢話一手樓市場仍然暢旺，可能要多謝一班父母嘅付出喇。
疫情爆發之初，唔少市民都期望樓價會下調到可以負擔嘅水平，但King Sir話美國自從實施量化寬鬆，大量資金落咗去資產市場，樓市再現「沙士價」嘅願望似乎要落空喇。佢又話普羅大眾喺呢段時間無疑係賺少咗錢，靠自己能力可能要較長時間儲首期，但多得一班父母本身好支持仔女置業，出錢出力之下令唔少新盤推出一輪就賣晒。
何國偉：居家工作帶動網購
King Sir同時勉勵啱啱畢業嘅後生仔唔好咁「灰」，因為有嘅係時間同青春，就算搵唔到工都係成個大環境嘅問題，又建議唔好將薪酬睇得太重，可以試吓從事唔同嘅工作，提升謀生技能。
談論猶如天文數字嘅樓價可能會有啲「離地」，不過講到日常消費就好貼身啦。恒生大學市場學系講師何國偉話居家工作帶動網上消費，佢話打工仔喺屋企使用電腦工作，可以一邊打文件一邊買飯盒。另外，大家喺屋企用得多電腦做嘢，令有關技能得以提升，同時令佢哋更熟習網上購物。但何國偉話消費習慣嘅改變會唔會持續深化，就要等待下回分解喇。
獅子山青年商會會長林卓鋒，同董事梁慧珊都認同何國偉嘅講法。其中林卓鋒更指自己因應疫情而多咗網上消費，又話最近試過網上落柯打叫外賣先至知咁方便，撳個掣落單就即刻送到屋企門口，仲因應疫情新增選項，避免外賣員同客人接觸，貼心又安全。
卓妮