中環出更：細個不慎墮井 劉佩玉：幸得好心人相救
香港人每日返工放工行色匆匆，成日畀人一種冷漠嘅感覺，究竟香港人係咪外人諗到咁冇愛心呢？定係唔肯幫人係因為驚「食檸檬」呢？深水埗左鄰右里關愛社會務顧問劉佩玉（Nicole）早前出席一個派愛心晚飯畀長者嘅活動，佢憶述童年時曾經唔小心跌入水井，好彩有個好心人救咗佢，不過當時年紀太細唔認得救命恩人嘅樣貌，之後都搵唔番恩人，但就教識Nicole樂於助人。
Nicole向來都樂於助人，然而少不免都試過有人唔領情。佢曾經上門派飯畀老人家，對方情緒唔太好所以大大力關門『嘭』一聲，Nicole都明白到唔係人人都會接受你嘅幫助，所以有時佢都會嘗試扮演「社工」嘅角色，去照顧埋受助者嘅情緒。
趙麗娟：逢天災港人都踴躍捐錢
香港會計師公會前會長趙麗娟（Susanna）覺得香港人好有善心，過往內地或者外國出現天災，港人都好踴躍捐錢，佢自己都曾經因為幫到人而好開心。今年二月初香港迎來第一波新冠肺炎疫情，更爆發口罩荒，市民周圍撲口罩。Susanna話有一次佢搭的士，司機係一個上咗年紀嘅伯伯。落車時Susanna畀完錢後，仲另外畀多咗五個口罩司機。Susanna憶述當時司機嘅眼神充滿感激同感動，令佢明白到好多嘢比錢更重要，而且幫到人自己都會開心。
講起做善事，港島常青扶輪社創社社長李錦文（Kenneth），有見疫情第三波爆發導致死亡個案驟升，當中好多都係長者，於是同香港聖公會樂民郭鳳軒綜合服務中心合作，日前到樂民新村向長者派發足夠一個人使用一星期嘅食物及防疫物品，期望老友記於非常時期減少外出購買日常用品，進而降低感染風險。Kenneth話為確保食品嘅保質期，今次派畀老友記嘅食物雖以乾糧同罐頭居多，不過都有按照營養師嘅意見而購買合適嘅種類，既易於消化之餘，又符合營養均衡咁話。
卓妮