政情：資深AO杜永恒 空降教育局惹議
教育局掌管學校發展及行政科的副秘書長今年四月出現空缺，該局年初曾召開晉升委員會，但搵唔到適合人選，於是調派資深政務官（AO）杜永恒暫時出任，呢個安排惹來部分教育界人士質疑，指政府高層安插人手掌控教育界人事升遷。有教育界人士話呢個職位向來由教育職系人員出任。教育局就解畫，話近年唔少人員已屆退休年齡，或基於個人理由提早退休或請辭，難免打亂高層職位接任計劃，又強調無意將呢個職位改由政務官永久出任喎。
相關職位近年皆教育職系人員出任
據了解，呢個職位掌管學校發展及行政科，負責監察本港學校辦學質素、審核學校嘅一般人事任免升遷，同埋對學校同老師嘅投訴。中學校長會主席鄧振強證實呢個職位近年來都係由教育職系人員出任，但就話教育局分別有六名副秘書長分管唔同事務，部分向來都係由政務官擔任，指業界留意到有關調動，但暫時未有作特別討論。
教育局發言人就話呢個職位喺本年四月出現空缺，局方根據公務員人事安排一貫做法喺年初召開晉升委員會，但未能揀選合適人員接任。由於職位唔能夠長期懸空，局方同公務員事務局商討後，決定調派一位乙級政務官暫時出任此職位，強調來年會再召開晉升委員會，考慮有冇教育專業職系人員適合升任副秘書長職級。發言人又話呢個職位曾喺○三年一月至○六年三月由政務官出任。