政情：政府懶溝通 外傭宿舍疫情恐失控
疫情未受控，早前更有外傭宿舍留宿嘅外傭被驗出確診，其中一人更已到新僱主家中上班。香港外傭工會顧問伍斯傑批評政府同外傭宿舍溝通不足，又指香港目前有好多由非牟利團體開設嘅外傭宿舍不受監管，成為疫情嘅潛在炸彈。
前南區區議員陳家珮（Judy）日前訪問伍斯傑，對於食物及衞生局局長陳肇始指無法追蹤曾與確診者於同一宿舍居住嘅其他女傭，伍斯傑直指冇可能追蹤唔到，事關啲外傭係同一個僱傭公司中介，應該有晒佢哋嘅資料，包括佢哋嘅僱主同地址。伍斯傑話業界好希望同政府多啲溝通。
伍斯傑仲話現時留喺香港嘅外傭，佢哋未必住喺持牌嘅業界宿舍，部分人住喺非牟利團體開設嘅外傭宿舍。佢話持牌嘅宿舍管理好嚴格，而且做足防禦措施，會要求入住嘅外傭須遵守相關嘅措施，但非牟利團體開設嘅外傭宿舍，規格未必咁好，有可能係疫情潛在嘅炸彈。
政府日前宣布會為外傭進行深喉唾液測試，伍斯傑認為政府應該喺外傭輸入嘅多國領事館出通告，等外傭知道呢個措施。