中環出更：人魚教父林育泉 靠食腦創水底事業

其實人魚運動有好多範疇，包括水底舞蹈、馬戲團等，難就難在需要着「魚皮」表演。Alan公司設立嘅MFI認證就係全球第一個人魚教育驗證系統，通過教育同培訓，成立咗人魚學生同教練學校，仲會幫助行業表演者通過更安全、更容易嘅方式喺行內輕鬆發展。最近喺城市青年商會第二十四屆創意創業大賞中獲獎嘅Alan仲話，未來將會把水下發展拓展到專業領域，包括培訓水下攝影師、安全員同推行人魚導演驗證。

同時獲獎嘅仲有香港躲避盤總會主席馮英豪。躲避盤作為新興運動，至今未普及化，而佢近年嚟喺社區、學校落力推廣躲避盤，仲話之後會專注喺躲避盤精英運動員嘅發展，盡力為香港爭取殊榮。

林育泉希望將個別人魚發展整合為人魚行業。	馮英豪想培訓專業嘅躲避盤裁判同教練。	阮穎姿準備專注做文化旅遊發展，公司將推出香港仔漁港遊。

馮英豪落力推廣躲避盤

雖然疫情期間推動躲避盤有所阻滯，但佢推動呢項運動已有五年，話會盡力發展躲避盤事業，目標係有朝一日街上唔單止有人玩足球、籃球，仲要有躲避盤。

另外，有份成立旅遊公司嘅阮穎姿（Jenny）就憑着新穎嘅活動遊艇，同埋為旅客帶來與眾不同嘅海上體驗而獲獎。Jenny認為同一款遊艇始終唔可以滿足唔同客人嘅需要，所以成立公司，旨在同船東同埋行家合作，令客人有更多選擇。佢公司提供嘅遊艇，唔單止可開Party（派對），仲可舉行婚禮、雞尾酒會、公司發布會，未來仲準備同各大酒店同旅行社做埋文化旅遊添！

卓妮