中環出更：黃傑龍翻睇30年前自拍片 笑度疫境
香港接連受社會事件同肺炎疫情衝擊，唔少香港人都生活困難。稻苗學會會長黃傑龍（Simon）睇套廣告片，竟然要停咗兩次休息吓，先勉強睇完，事關佢笑到胃抽筋呀！
Simon話三十年前冇iPhone、iPad，所有拍攝同剪接都係用菲林做，再加埋特異功能嘅特技效果，可謂嘔心瀝血。Simon話喺呢個時候收到呢條片，唔通係提醒佢人生本來就係一場戲，無論中間嘅劇情幾咁曲折離奇、戇居同匪夷所思，最後睇番都係笑到胃抽筋。最後，佢希望無論面對乜嘢困境，都祝大家Sure-Win（必勝）。
因應疫情，武術界名宿李暉嘅太極中心早前停課，變相令佢有空閒可以睇番以前拍過嘅電影，呢套戲仲係同甄子丹對打添！佢形容呢次合作好難得。其實，佢仲分享咗另一套電影，係○八年嘅舊作，即係十二年前拍嘅。網友仲大讚佢一派女俠風範，睇落依家同以前一個樣添！
講開功夫，香港中華廠商聯合會會董黃偉鴻（Ellis）早前喺社交平台貼文，話專登去買咗雙節棍自學，仲問會唔會自己扑濕自己？使唔使帶個賽車頭盔保護個頭？有網友就建議佢戴頭盔穩陣啲。Ellis話首次接觸雙節棍，喺屋企睇片自學四晚，發覺好易學，最緊要按部就班，但佢覺得動作仍然生硬。之後佢仲拍咗短片，睇佢揮動雙節棍相當純熟，呢啲咪就係日子有功囉。
卓妮