政情：相片遭盜用代言口罩風扇 何栢良：假廣告
染疫人數每日逾百宗，政府實施強制戴口罩，但有人就乘機渾水摸魚。香港大學感染及傳染病中心總監何栢良尋日喺社交平台話有公司喺未獲得佢授權嘅情況下，用佢張相作宣傳，已經指示律師向公司發信。
會採取法律行動
有關公司係用何栢良嘅名聲為所售賣嘅「口罩風扇」作宣傳，何栢良話呢個係「假廣告」，強調自己唔會建議任何人買相關產品，自己亦絕對唔會買，佢會就未獲授權嘅相關使用，引致嘅誤導、誤解、誤會採取法律行動。
何栢良亦隨即喺社交平台發聲明，話有公司用佢個名同相片為產品作宣傳，佢已經嚴正要求公司即刻移除有關嘅資訊。
其實早前亦喺網上流傳一段錄音，話係何栢良講嘅，而佢仲專登喺社交平台出聲明話「病毒唔等人、真假要識分」，澄清網上流傳嘅錄音係假冒嘅，呼籲市民唔好再傳，仲教大家點樣分辨錄音嘅真假，話真錄音頭兩句一定會介紹全名、錄音日期同時間，同埋唔會寫錯自己個名，更會有傳媒引用。