政情：疫境有錢剩 區會𦧲番轉頭叫民政局咪削撥款

曾報復式互削撥款

區議會喺年初開波，已有民主派區議員要求檢討撥款指引，阻止建制派啲「衞星組織」獲批撥款搞活動，甚至一啲盛事例如龍舟嘅撥款都唔批。雖然民主派有批出部分撥款做防疫，但民政事務總署之後就以抗疫理由要削減十八區區議會嘅「社區參與撥款」，搞到啲民主派好不滿，有幾個區仲報復，包括葵青、荃灣同油尖旺等，都分別通過咗削減或暫停民政處同民政總署嘅撥款。

今年嘅會期只剩番幾個月，依家疫情又再大爆發，所有活動停晒，可見區議會嘅撥款肯定用唔晒。剩低嘅撥款唔單止要畀番庫房，區議會仲有不成文規定，如果今年度用唔晒啲錢，下年度仲會按比例或程度去削減撥款添！

盼特事特辦遭冷待

西貢區議會主席鍾錦麟都話依家疫情爆發得咁厲害，有好多活動搞唔到，估計到時都會有撥款使唔晒，擔心民政署因而減撥款。元朗區議會主席黃偉賢就形容情況特別，好多活動就算批咗都搞唔到，建議政府不如將撥款餘額轉到下一個年度，希望可以特事特辦。佢透露曾經同該區嘅民政事務專員傾過，但對方冇反應。

民政總署回覆話，喺分配撥款予十八區區議會時，政府會考慮各項因素，包括人口、社會經濟情況、地區面積，同埋過往使用撥款嘅模式。區議會可根據所得嘅撥款額，選定、提出同推行項目及活動，以切合地區的需要。佢哋仲話根據《運用區議會撥款守則》，喺財政年度完結時，所有未動用嘅社區參與計劃撥款額將會取消，現時並無機制讓區議會將一個年度嘅社區參與計劃撥款未用餘額轉至下一個年度。

之前兩邊啲關係鬧到咁僵，依家民主派唔再係要求減撥款，而係倒轉頭要求當局唔好減區議會撥款，真係世界輪流轉。結果係點？大家拭目以待嘞！